A imparable artista sarriá, Mercedes Vázquez Saavedra, fotógrafa e etnógrafa, ofrecerá o vindeiro día 26, na súa vila natal, unha charla baixo o título de "Unha viaxe polo mundo da máscara", enmarcada dentro do foro La Unión-El Progreso. Será ás 20:00 h, na sede da Sociedade Cultural e Recreativa "La Unión".
Desde hai máis de trinta anos, a creadora non para de viaxar, fundamentalmente por Galicia e Portugal, para documentarse sobre os entroidos con máis tradición, como o Oso da Proba de Brollón, os Compadres e Comadres de Monforte de Lemos ou o Entroido Ribeirao de Chantada.
Durante a súa intervención, apoiada con material gráfico, achegará ao público o mundo das máscaras, que tan ben coñece polo seu incesante percorrido por aldeas galegas e portuguesas, reivindicando este importante patrimonio.
Mercedes Vázquez Saavedra realizou, desde o ano 2018, preto de sesenta exposicións dedicadas ás máscaras, ás mulleres e aos traballos do campo. É membro da Academia Ibérica da Máscara e recibiu recoñecementos como o de Mestra da Memoria, concedido pola Asociación de Escritores en Lingua Galega, ou Arriana Maior. Recentemente, foi elixida para ser a pregoeira da Semana Santa o vindeiro 11 de abril en Sarria.
A charla organizada polo grupo El Progreso e La Unión forma parte dos encontros destas dúas identidades centenarias, que se iniciaron en 2017, co fin de crear en Sarria unha tribuna para a análise, a reflexión e a difusión sobre asuntos de actualidade.
