Unha investigación exhaustiva realizada polo tudense Alfonso Ferreira ao longo de 2024 no Camiño Portugués ao seu paso por Tui evidencia que un número significativo de peregrinos que chegan á cidade pola ruta da Costa, procedente de Portugal, non están a ser incluídos nas estatísticas oficiais. O estudo, presentado recentemente, realizou 4.324 enquisas a pé de Camiño nos meses de febreiro, maio, agosto e novembro.
A investigación estatística de Ferreira revela que dos 39.546 peregrinos contabilizados durante eses catro meses, un 16% (702 persoas) chegaron a Tui a través do trazado oficial portugués do Camiño Portugués da Costa (Viana – Caminha – Valença), un fluxo que non se reflicte correctamente nas cifras da Oficina do Peregrino da Catedral de Santiago. No ano pasado, esta oficina entregou 93.176 “Compostelas” a peregrinos do Camiño Portugués (central).
Segundo as conclusións do estudo, o número real de peregrinos que parten ou pasan por Tui é aproximadamente o dobre dos que se contabilizan na ruta da Costa no seu tramo por A Guarda – Vigo. Isto cuestiona directamente as estatísticas oficiais, que suman os peregrinos da Costa (incluíndo o tramo portugués) aos que realizan o trazado por A Guarda e Vigo, inflando así as cifras desta última ruta e infravalorando o fluxo real por Tui.
A concelleira de Turismo de Tui, Ana María Núñez, felicitou e agradeceu a Alfonso Ferreira este traballo, que confirma o notable incremento de peregrinos que utilizan o trazado portugués da Costa dende a súa oficialización. Núñez coincidiu na necesidade de solicitar á Oficina do Peregrino da Catedral de Santiago que axuste o seu método de conteo para reflectir a nova realidade do Camiño Portugués ao seu paso por Tui.
O estudo tamén ofrece datos detallados sobre o perfil dos peregrinos que pasan por Tui: o 56% son mulleres, o 44% homes, e os principais grupos de idade son de 20-40 e 40-60 anos. Un 73,5% ten estudos superiores e contabilizáronse peregrinos de 73 países, sendo os estranxeiros maioría (57,5%), principalmente de Portugal, Alemaña e Italia. Entre os españois, destacan os procedentes de Andalucía, Madrid e Valencia. A motivación principal para realizar o Camiño é espiritual (49,8%), seguida da cultural, deportiva e relixiosa. A maioría alóxase en albergues privados (58,9%) e viaxa acompañada por ata tres persoas (74,9%). Un dato salientable é que a principal fonte de información sobre este Camiño Portugués de Tui é o “boca a boca”. Ademais, a inmensa maioría dos enquisados visitaron Tui durante a súa estadía e un alto porcentaxe (2.483) manifestou a súa intención de volver.
A edil tudense tamén destacou a alta satisfacción dos peregrinos coa súa visita a Tui, o que anima a repetir e recomendar a cidade, evidenciando a hospitalidade local e a calidade do seu patrimonio.
