O equipo do filme Cuñados, primeira longametraxe de ficción da produtora galega Portocabo, presentou hoxe o inicio da súa rodaxe, que dará comezo a semana que vén e se desenvolverá integramente na cidade de Ourense e noutros puntos da provincia. A Xunta de Galicia cofinancia a película cunha achega económica de preto de 260.000 euros como un dos 13 proxectos subvencionados a raíz da convocatoria de axudas a producións e coproducións audiovisuais de 2018.
O director da Axencia Galega das Industrias Culturais (Agadic), Jacobo Sutil, acompañou o presidente da Deputación de Ourense, José Manuel Baltar, e o equipo de Cuñados no acto cos medios de comunicación, onde fixo fincapé nesta liña anual de apoio do Goberno galego ao noso audiovisual. Neste sentido, explicou que o Plan de reactivación dos sectores cultural e turístico facilítalles ás produtoras unha serie de ferramentas para enfrontar os efectos económicos da crise sanitaria, como as modificacións nas bases das axudas encamiñadas a ampliar prazos e a dotar as empresas de liquidez a través da flexibilización dos pagamentos anticipados, entre outras.
PROFESIONAIS GALEGOS
Sutil felicitou a Portocabo por manter a súa aposta polos profesionais galegos, tanto a nivel artístico como técnico, ademais de por esta primeira incursión no ámbito das longametraxes cinematográficas de ficción, que tamén vén avalada pola súa selección na segunda mesa de valoración de cine de RTVE. Conta, así mesmo, coa participación de TVG e a colaboración da Deputación de Ourense.
Xosé A. Touriñán, Miguel de Lira e Federico Pérez son o trío protagonista desta comedia costumbrista e familiar sobre as peripecias disparatadas e criminais de tres cuñados, na que tamén actúan Iolanda Muíños, Eva Fernández e María Vázquez. O filme supón, igualmente, o salto á longametraxe do seu realizador, Toño López, tras dirixir destacadas series internacionais como Miracle Tunes ou Auga Seca, tamén con Portocabo á fronte da produción.
No equipo técnico, figuran outros coñecidos nomes do noso audiovisual como Alfonso Blanco (produción executiva), Araceli Gonda (guión), Santi Jul (música), Ana Míguez (dirección de produción), Jaime Pérez (dirección de fotografía), Lu Rodríguez (montaxe), Andrea Pozo (dirección artística) e Saturna (vestiario).
Con Cuñados, Portocabo volve escoller a provincia de Ourense como escenario, despois de rodar aquí a serie galego-portuguesa Vidago Palace, tamén con subvención da Xunta ao igual que Auga seca. Tras a súa emisión na TVG e RTP, Vidago Palace pode verse xa en HBO Portugal e chegará proximamente ao catálogo HBO España.
