A Xunta de Galicia conmemorará o Día de Rosalía, o vindeiro 23 de febreiro, cunha ampla programación de actividades que inclúe propostas nas bibliotecas públicas e iniciativas en colaboración coa Fundación Rosalía de Castro. O director xeral de Cultura, Anxo M. Lorenzo, anunciou a programación nun acto na Casa da autora, en Padrón, xunto ao presidente da Fundación Rosalía de Castro, Anxo Angueira.
M. Lorenzo destacou a importancia de homenaxear a "nosa poeta máis universal", símbolo da identidade galega, e convidou á poboación a sumarse á celebración.
Actos oficiais e Caldo de Gloria
Os actos oficiais, en colaboración coa Fundación Rosalía de Castro, realizaranse en Santiago de Compostela e Padrón, lugares de nacemento e pasamento da autora. A celebración comezará en Santiago ás 10:00 horas cunha ofrenda floral na praza de Vigo, seguida do acto central no Panteón das Galegas e Galegos Ilustres ás 11:00 horas.
Pola tarde, a Casa de Rosalía de Padrón acollerá a novena edición do Caldo de Gloria, elaborado polo chef Alberto Carou, do restaurante O Curral do Marqués. O prato tamén se degustará en centros galegos do exterior, como os de Castellón, León e Pamplona.
A cantante Antía Muíño pechará o día cunha actuación no auditorio da Casa-Museo ás 20:00 horas. Ademais, celebrarase a tradicional Alborada de Rosalía coa Asociación de Gaiteiros e Gaiteiras Galegas.
Programación nas bibliotecas da Xunta
As bibliotecas da Xunta de Galicia conmemorarán o Día de Rosalía durante todo o mes de febreiro con actividades como contacontos, mostras bibliográficas, obradoiros e actividades infantís.
- Biblioteca de Galicia (Santiago): Conversa arredor de Rosalía e a natureza (27 de febreiro)
- Biblioteca Pública Ánxel Casal (Santiago): Contacontos Rosalía Pequena (22 de febreiro), mostra Sempre Rosalía e actividades virtuais.
- Biblioteca Pública Miguel González Garcés (A Coruña): Obradoiro Ramas Literarias (24 e 26 de febreiro) e mostra Parabéns Rosalía.
- Biblioteca Pública de Lugo: Contacontos Menú de contos (21 de febreiro) e concerto de Son de Corda (27 de febreiro).
- Biblioteca Nós (Ourense): Mostra Rosalía en verso e contacontos Airiños, aires... de Rosalía (25 de febreiro).
- Biblioteca Antonio Odriozola (Pontevedra): Mostra Rosalía de Castro. A voz das letras galegas.
- Biblioteca Juan Compañel (Vigo): Versos de Rosalía e sesións de narración oral (21 de febreiro).
A Xunta de Galicia convida a toda a cidadanía a participar nas actividades e a honrar a memoria de Rosalía de Castro, unha das figuras máis importantes da cultura galega.
