O Instituto de Educación Secundaria (IES) Miraflores de Oleiros está de aniversario! Este ano 2025, o centro educativo conmemora 25 anos de traxectoria formando a mozos e mozas da comarca e contribuíndo ao desenvolvemento da sociedade.
A súa andaina comezou no curso 1999/2000 nas instalacións do CEIP Ramón Mª del Valle-Inclán, con 40 alumnos e alumnas. Ao curso seguinte, trasladouse ao seu edificio actual na Avenida Miguel Hernández, 4-8 (Oleiros). Nos seus inicios, era un centro exclusivamente de educación secundaria obrigatoria e non foi ata o curso 2006/2007 cando se implantou o bacharelato.
O IES Miraflores experimentou un crecemento constante na súa matrícula nos últimos anos. No curso 2020/2021, as solicitudes para o centro non deixaron de medrar, o que provocou que na actualidade a súa matrícula ascenda a máis de 650 alumnos e alumnas. Este aumento fixo necesario que o centro acometa, durante o presente curso académico, obras para poder atender a dita demanda.
Nestes 25 anos, o IES Miraflores contribuíu coa sociedade na formación de grandes profesionais e grandes persoas. Dende os seus inicios, o centro destacou por potenciar valores non só relacionados co rendemento académico como o esforzo, a resiliencia ou o afán de superación senón tamén con boas prácticas como o deporte, a vida sa, a tolerancia, a solidariedade ou a inclusión. Boa mostra son todas as actividades deportivas, saudables, inclusivas e solidarias nas que participa o centro, entre as que a Carreira da Luz, a recadación que acaba de levar a cabo a comunidade educativa para a reparación dun instituto danado pola DANA en Utiel (Valencia) ou a actividade deportiva e de convivencia da Semana branca en Andorra na que acaban de participar 232 alumnos e alumnas son un bo exemplo disto.
É por todo isto polo que queremos celebrar estes 25 anos de formación e de convivencia durante os cales pasaron polo centro máis de 2.000 alumnos e alumnas. Todos e todas eles/as, xunto co profesorado, persoal non docente e familias, forman parte desta gran familia do Miraflores e a todos e todas eles/as queremos mostrar o noso recoñecemento neste ano 2025 no que o IES Miraflores é o que é como consecuencia da pegada que todos e todas teñen deixado aquí.
Para conmemorar estes 25 anos levaremos a cabo diversas actividades que irán sendo anunciadas na páxina web do centro e entre as que podemos destacar:
- En febreiro, a plantación dunha árbore e a organización dunha mesa redonda con ex alumnos/as e profesorado do centro.
- En marzo, a organización dunha mesa redonda con expertos en educación.
- En abril, unha exposición fotográfica da historia do IES Miraflores e en maio unha semana cultural.
Todos estes actos conmemorativos rematarán o domingo, 25 de maio (25/05/25), cunha festa de confraternización entre toda a comunidade educativa do IES Miraflores.
