279 alumnos galegos acreditarán o seu nivel de portugués grazas ao apoio da Xunta

Un total de 279 alumnos de 23 institutos de toda Galicia poderán acreditar de forma gratuíta o seu nivel de portugués co apoio da Xunta de Galicia. Estes son os seleccionados na nova convocatoria da Consellería de Educación, Ciencia, Universidades e FP que facilita que o alumnado de centros que imparten lingua portuguesa poida participar nas probas Camões Júnior para certificar as súas competencias neste idioma.

Galicia convértese así na primeira comunidade autónoma en subscribir un acordo destas características co Instituto Camões, un acordo que ademais deriva da aplicación da Lei Valentín Paz Andrade para o aproveitamento da lingua portuguesa e os vínculos coa lusofonía. A isto súmanse outros programas xa en marcha como Escolas de fronteira ou Ponte nas Ondas, que fomentan a relación entre os escolares de ambos países.

En total, realizarán estas probas, totalmente gratuítas para as familias, 181 alumnos de 4º de ESO e 98 de 2º de Bacharelato. Todos eles cursan Portugués como primeira ou segunda lingua estranxeira no seu centro. Os centros participantes son os seguintes: 

Probas en liña

As probas, que se realizan a través dunha plataforma electrónica, consisten nun único exame para avaliar o grao de desempeño global nas competencias de comprensión e de expresión oral (un 50% da puntuación total) e de comprensión e expresión escrita (outro 50%) co fin de acreditar o nivel lingüístico A1, A2 ou B2 do Marco Común Europeo de Referencia para as Linguas.

Para conseguir a certificación, os estudantes terán que superar as probas do Exame de Portugués Lingua Estranxeira Camões Júnior, pero non terán que desprazarse para facelo, senón que as farán desde o seu centro educativo a través dunha plataforma electrónica.

O Instituto Camões será o encargado da organización e xestión das probas, que de forma xeral se levarán a cabo nas instalacións de cada centro educativo nas datas acordadas entre ambas partes.