A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. Como colofón dos seus estudos, os xoves músicos están a protagonizar varias actuacións nestas semanas, que están a ter lugar no Paraninfo da Universidade de Santiago, na facultade de Xeografía e Historia, todas elas ás 20.30 horas.
As entradas destes concertos son gratuítas ata completar aforo. Non obstante, debido á situación sanitaria provocada pola COVID-19, as persoas interesadas en asistir deberán reservar praza (máximo dúas por persoa), enviando un correo electrónico a [email protected] (indicando o seu nome, apelidos e teléfono), ata o día do concerto ás 12:00 horas.
Mañá martes, 15 de xuño, o concerto comezará coa actuación da violoncellista Carmen Ramírez, que tocará a versión para violoncello da Sonata para violín e piano do compositor francés César Franck.
De seguido a violinista Sabela Hughes achegará ao público parte da obra Souvenir d'un lieu cher (Lembranza dun lugar querido) de Tchaikovsky e un fragmento do Concerto para violín en Re de Beethoven.
E a velada musical concluirá co Concerto para trompa nº 2 de Richard Strauss, que soará da man do trompista Miguel Linares.
Esta iniciativa de “A Escola na Cidade” continuará este venres, día 18 de xuño, co derradeiro concerto do ciclo deste curso protagonizado polos alumnos da Escola de Altos Estudos Musicais (EAEM).
