Mañá martes, 22 de abril, ás 19:00 horas, o Museo do Pobo Galego acollerá a inauguración da exposición "Castelao: o retorno a Galicia, 1984", que presenta 52 imaxes capturadas polo fotoxornalista Xan Carballa durante os emotivos actos que acompañaron a chegada a Galicia dos restos de Alfonso Daniel Rodríguez Castelao o 28 de xuño de 1984.
A mostra, que chega procedente do Museo de Pontevedra, ofrece unha visión documental daquel día histórico, a través das fotografías tomadas por Carballa no aeroporto de Lavacolla, nos exteriores de San Domingos de Bonaval e no Panteón de Galegas e Galegos Ilustres, lugar de derradeiro descanso da figura senlleira do galeguismo.
Baixo o comisariado de Xosé Enrique Acuña, a exposición poderá visitarse na Ala Sur do Museo do Pobo Galego ata o vindeiro 15 de xuño, en horario de martes a sábados, de 16:00 a 20:00 horas. Unha oportunidade única para revivir un momento clave da historia de Galicia a través da mirada dun destacado fotoxornalista.
