A Escola de Altos Estudos Musicais (EAEM) ten en marcha a iniciativa “A Escola na Cidade”, un ciclo de concertos de música de cámara interpretados polos alumnos do Curso Avanzado de Especialización Orquestral do centro. Esta semana celebraranse dous concertos no Paraninfo da Universidade de Santiago, na facultade de Xeografía e Historia, mañá martes día 23 e o venres 26, os dous ás 20.00 horas, cunha duración estimada de 45 minutos cada un.
Estas actuacións son gratuítas pero, debido á situación sanitaria provocada pola COVID-19, as persoas interesadas en asistir aos concertos deberán reservar praza (máximo dúas por persoa), enviando un correo electrónico a [email protected] (indicando o seu nome, apelidos e teléfono), ata o día do concerto ás 12:00 horas.
O martes, obras de Debussy e Shostakóvich
No marco deste programa, mañá martes os rapaces da EAEM ofrecerán o Cuarteto en Sol menor de Claude Debussy (1862-1918). Os asistentes terán ademais a oportunidade de escoitar o Cuarteto de cordas nº 8 do compositor ruso Dmitri Shostakóvich (1906-1975). Participarán os alumnos de violín Matthias Leonhard Emmerink, Clara Pedregosa, Christian Casanova e Silvia Cánovas, a viola Carmen María Navarro e as violoncellistas Carmen Ramírez e Clara Martínez.
O venres, obras de Haydn e Hensel
O venres o público poderá gozar con dúas obras, o Cuarteto de cordas nº 1 de Joseph Haydn (1732-1809) e o Cuarteto de cordas de Fanny Hensel (1805-1847). Será da man dos alumnos Manuel Jesús Muñoz e Sabela Hughes ao violín, Vicent Mañez coa viola e Carmen Ramírez ao violoncello.
