O Multiusos de Torneiros acolleu hoxe a visita do Conselleiro de Emprego, Comercio e Emigración, José González Vázquez, para coñecer de primeira man os programas mixtos de emprego e formación que se están a desenvolver no Concello do Porriño co financiamento da Xunta de Galicia.
O acto contou coa participación do Alcalde do Porriño, Manuel Alejandro Lorenzo Alonso, da Concelleira de Emprego e Formación, Rosario Costas Táboas, representantes institucionais, empresarios locais e o alumnado-traballador dos programas.
Durante o evento, presentáronse os proxectos en marcha:
- Programa de emprego "O Noso Encontro co Emprego": Dirixido a menores de 30 anos, con formación en albanelería de urbanización e carpintería de madeira. O alumnado realizará traballos de reparación en pasarelas de madeira e renovación de beirarrúas.
- Obradoiro Dual de Emprego "O Porriño Humaniza": Dirixido a desempregados, con formación en albanelería de urbanización e pintura. Realizarán traballos de renovación en beirarrúas e labores de albanelería e pintura en edificios e rúas do municipio.
O Alcalde destacou a mellora da empregabilidade e o desenvolvemento económico do municipio, mentres que a Concelleira puxo en valor o esforzo do alumnado.
Estes programas, xunto con outras políticas activas de emprego, supoñen un investimento superior aos 1.250.000 euros por parte da Xunta, e unha aportación do concello que supera os 300.000 euros. Grazas a esta colaboración, máis de 500 persoas mellorarán as súas oportunidades de inserción laboral.
O Conselleiro reafirmou o compromiso da Xunta con este tipo de programas, e o Concello do Porriño destacou a vontade de seguir traballando coa Xunta para impulsar a formación e o emprego.
