A Eurocidade Tui-Valença será o escenario da 20ª edición da iniciativa "As Prazas de Europa", impulsada pola Comisión Europea, o próximo martes 8 de abril no Paseo da Corredoira en Tui. O evento, que se celebrará de 18:00 a 20:00 horas, ou no espazo sociocultural da rúa Camilo José Cela en caso de choiva, busca promover o diálogo entre representantes institucionais e cidadáns sobre o futuro de Europa e o impacto da Unión Europea nos municipios rurais.
A celebración coincide co 40º aniversario da adhesión de España e Portugal á Comunidade Económica Europea, e centrarase en como a cooperación interrexional mellorou a vida dos cidadáns transfronteirizos. O acto contará coa presenza dos alcaldes de Tui e Valença, así como de representantes da Comisión Europea en España e Portugal, e da Axencia Europea de Control de Pesca.
Actividades e diálogo cidadán
A xornada incluirá a presentación de proxectos financiados con fondos europeos que benefician á rexión transfronteiriza, como o Grupo de Acción Local Eu Rural, a marca Río Miño e o proxecto EUTERPE_ADN. Tamén se celebrará un diálogo cidadán sobre "Os 40 anos da UE na Raia", no que persoas de diferentes xeracións compartirán as súas experiencias e perspectivas sobre o pasado, presente e futuro da UE.
Para rematar, os asistentes poderán desfrutar dun Euroaperitivo na praza da Inmaculada, con produtos locais con Denominación de Orixe Protexida (DOP) e Indicación Xeográfica Protexida (IXP).
O Concello de Tui e a Cámara de Valença convidan a toda a cidadanía a participar neste encontro, que destaca a importancia da cooperación europea para o desenvolvemento local e a construción dunha Europa máis próxima ás persoas.
