O Concello do Porriño continúa co seu plan de mellora e ampliación dos espazos públicos da vila coa adquisición de dúas novas parcelas fronte ao parque infantil, preto do cemiterio municipal. Esta actuación permitirá a creación de novas zonas de lecer e o reforzo da accesibilidade na contorna, enmarcada na fase final dun proxecto integral de humanización e revitalización da zona.
O alcalde do Porriño, Alejandro Lorenzo, subliñou o compromiso do Concello coa creación de espazos públicos accesibles e modernos, adaptados ás necesidades da veciñanza. A ampliación do parque infantil e a incorporación de novas infraestruturas buscan converter O Porriño nunha vila máis humana e sostible.
Novas áreas de xogo e infraestruturas deportivas
O proxecto contempla a creación de novas áreas recreativas con elementos infantís innovadores, como unha gran estrutura en forma de tren con tobogáns e chorros de auga para os máis pequenos. Tamén se habilitará unha pista deportiva e completarase a beirarrúa que conecta coa rúa Domingo Bueno, mellorando a iluminación da contorna.
A recuperación da pista deportiva prefabricada, que fora retirada durante as obras de renovación do parque infantil, é outro dos puntos destacados. Esta pista, punto de encontro da mocidade durante anos, será reinstalada nunha nova localización que optimizará o espazo dispoñible e mellorará a súa integración co contorno.
Mellora da accesibilidade e integración urbana
Un dos obxectivos clave desta actuación é a mellora da accesibilidade ao cemiterio municipal. Para facilitar o acceso aos usuarios, habilitaranse novas prazas de estacionamento e crearase unha rúa que conectará Fernández Areal co cemiterio.
Esta actuación reforzará a integración desta área coas recentes humanizacións da rúa Parque Infantil e do Campo da Feira, sumándose ás obras en execución como a rehabilitación do Templete da rede de San Luis e a humanización da rúa San Sebastián.
Con esta nova adquisición e as melloras previstas, o Concello do Porriño reafirma a súa aposta pola creación de espazos públicos accesibles e de calidade, favorecendo a convivencia interxeracional e o benestar da cidadanía.
