A Semana Santa de Tui presentará novidades no ano 2025 coa incorporación dun novo acto procesional na xornada do Xoves Santo. Así se anunciou esta mañá na presentación da programación da Semana Santa 2025 na casa do concello, que contou coa participación do alcalde, Enrique Cabaleiro, a concelleira de Cultura, Sonsoles Vicente, a presidenta da Irmandade do Doce Nome de Xesús e Santa Casa da Misericordia, Begoña Martínez Lorenzo, o presidente da Asociación de Exvoluntarios de Protección Civil de Tui - Cristo da Agonía, Juan Juan Sío Castro, e o prior da Irmandade, párroco de Tui e cóengo da Catedral, D. Santiago Freire Comesaña.
Unha celebración de gran valor cultural e turístico
O alcalde de Tui, Enrique Cabaleiro, destacou a dimensión da Semana Santa tudense "na posta en valor do noso patrimonio cultural" e no feito de ser "un elemento de potenciación do noso sector turístico, sen esquecer que a finalidade primeira da celebración da Semana Santa é a súa dimensión espiritual". Enrique Cabaleiro referiuse tamén ao lugar preeminente e de liderado que a Semana Santa de Tui ten.
Pola súa banda, a concelleira de Cultura de Tui, Sonsoles Vicente, salientou a importancia e singularidade da Semana Santa tudense. Do mesmo xeito que o alcalde referiuse ao compromiso inequívoco do Concello con esta celebración, coma se reflicte na edición dun libro de 16 páxinas no que se recollen non só os distintos actos previstos senón tamén a historia da Semana Santa tudense. Así coma na organización, por parte do Concello, da procesión do Santo Enterro o Venres Santo. Agradeceu a colaboración de todas as entidades e persoas que fan posible levar a cabo esta programación, salientando precisamente a importancia desta colaboración.
Novidades na programación
A presidenta da Irmandade do Doce Nome de Xesús e Santa Casa da Misericordia, Begoña Martínez Lorenzo, foi a encargada de anunciar a novidade deste ano que será a celebración da Procesión da Oración do Señor na horta das Oliveiras, que terá lugar o Xoves Santo, ás 21.30 horas.
O programa da Semana Santa abrirase este domingo, 6 de abril, ás 18 h na capela das Reliquias na Catedral coa lectura do pregón a cargo do bispo emérito da diocese de Tui-Vigo, D. Luis Quinteiro Fiuza. As celebracións litúrxicas serán presididas ou polo bispo titular, Don Antonio Valín, ou polo bispo emérito, Don Luis Quinteiro.
Unha tradición secular
A Semana Santa tudense conta cunha tradición secular, existindo referencias á mesma en textos do século XIII.
