"Máis de vinte litros de pintura, distribuídos en cinco cores, e quince de imprimación, son os que está a empregar o artista de Quintela de Leirado, Xulio Fontes, na realización dun mural de 180 metros cadrados (40m x 4,5m) no interior do Pavillón Municipal de Entrimo, capital arraiana. Alí, o fillo de Forxán instalou os seus andamios e comezou a representar, na parede lateral do recinto deportivo, unha alegoría á raza cachena. A obra creativa fusiona a tradición gandeira cunha linguaxe artística contemporánea, embellecendo así o municipio e fortalecendo a súa identidade. Esta iniciativa é un convite da Corporación Municipal, presidida por Ramón Alonso López.
O autor, noutrora, na terra que o viu nacer, no lugar de Forxán (Quintela de Leirado), xa fora noticia ao pintar os postes do alumeado público, unha intervención da que xa non queda nada, agás a publicación dun catálogo naquelas datas.
Despois de rematar o mural no Pavillón, está prevista unha exposición da súa obra pictórica no museo público municipal, Pura Santos, espazo cultural inaugurado o 29 de marzo de 2014. Este museo está dedicado á finada mestra da localidade, unha educadora comprometida coa cultura e a tradición. A inauguración da exposición coincidirá co día 2 de agosto, acto de nomeamento do Arraiano Maior.
Xulio Fontes, moi querido por moitos, entre eles o escritor Méndez Ferrín, está inmerso noutros proxectos no medio rural. Un deles consiste en dar a coñecer os Muíños do Folón e do Picón, no concello de O Rosal, a través das artes. Unha obra súa forma parte dunha mostra itinerante polo Camiño Portugués, desde Lisboa a Santiago de Compostela, na que participan máis de medio cento de destacados creadores, como Antonio Abad, Puri del Palacio, Marieta Quesada, Ana P. Serres, José Miranda, Camilo Camaño, Agustín Soage, Irene Parga, Diana Cordero, Galia Blanco, Lucía Corrochano, Waldirene Fraga, Jorge Andrés Serrano, Margarita Forteza, Orlanda Gómez, Verónica Alcácer "La Niña Vero", David Quinteiro e o arquitecto Mauro Lomba.
No verán, volverá a Forxán, o seu berce, para continuar outro soño a piques de rematar: unha intervención que dará continuidade aos murais que sorprenden tanto á veciñanza como a todos aqueles que se achegan ás saias do Penagache. Alí, o artista pintará as portas e contras das casas deshabitadas, dándolles vida a través das cores elixidas por el mesmo.
