Polo que parece a Unión Europea, punteira en moitas cousas, está disposta a tomar medidas para diminuír o exceso de burocracia nas empresas. En concreto pretende reducir nun 25% os trámites administrativos que se ven obrigadas a realizar e ata un 35% no caso das pymes; o cal, segundo o estimado, aforraríalles 35.000 millóns de euros. Benvida sexa esta iniciativa, pois o exceso do papeleo lastra -e moito- a súa competitividade.
Que o exceso e a lentitude desesperante de trámites provoca que moitos empresarios so pensen dúas veces antes de comezar un negocio, non é un segredo.
A maioría da cidadanía, con razón, non acaba de entender as trabas burocráticas existentes para emprender un negocio; comezando polo meu perruqueiro, quen me contou o calvario que tivo que sufrir para abrilo. Entre o día en que pediu a licencia para comezalo e o día en que puido facelo pasou moito tempo; véndose obrigado a pagar máis de dous meses do aluguer sen poder traballar porque a licencia se retrasou a pesar de cumprir con todos os requisitos.
Segundo contoume Pedro, empresario que viviu e traballou trinta anos no estranxeiro, para conseguir calquera licencia na UE en xeral -e en Italia e España en particular- tardas moito tempo. En España tiña unha empresa pesqueira e poñíanlle trabas para todo. Igual que en Italia, onde creou unha empresa de comunicación.
A creación desta última costoulle un gran esforzo porque non lle deixaban contratar directamente a xornalistas de EEUU, obrigándolle a facelo a través dunha axencia gobernamental. Cando lles dixo que non podía ser porque tiñan que saber inglés e español e necesitaba entrevistalos persoalmente, contestáronlle que non se preocupara porque tamén lle podían seleccionar tradutores. Ao final acabou creando unha empresa de comunicación en EEUU e facendo un convenio coa empresa italiana para que aquela prestará os seus servizos nesta.
Outra cousa negativa de Italia é que adoitan esperar a facer as inspeccións pouco antes de que pasen cinco anos dende a creación da empresa para que as posibles infraccións non prescriban; coa intención de que, ao ter pasado tanto tempo, fáltenche documentos e sancionarche, aínda que os achegases antes.
Segundo a experiencia de Pedro, en EEUU unha empresa crease nun día ou nunhas horas e para determinar o seu obxecto pode indicarse que se vai dedicar a todas as actividades, sen prexuízo de que para as que desenvolven actividades perigosas tarden máis.
A última nova negativa que tiven sobre o exceso de papeleo foi a de Marcelo, quen decidiu deixar o negocio que ten aquí para marchar a Letonia por este motivo. Seu traballo consiste en deseñar proxectos de hotel no ordenador para que, quen queren construír un, teñan claro as súas características xerais antes de encargalo: número de pisos e habitacións, tipo de cociña e exteriores... Seu servizo vai destinado para hoteis pequenos; non para os das grandes cadeas, as cales soen ter un modelo estándar moi definido.
Triste marcha a de Marcelo, a quen lle gusta dicir que se viu obrigado a marchar por culpa da bur(r)-ocracia...