A conferencia de mañá martes centrarase na sanidade dos castiñeiros e da castaña. Impartiraa Fina Lombardero, profesora titular do Departamento de Produción Vexetal e Proxectos de Enxeñaría da Escola Politécnica Superior de Enxeñaría de Lugo (Universidade de Santiago). É doutora en Bioloxía con máis de dúas décadas de experiencia traballando no eido das pragas e as enfermidades forestais, centrándose nos últimos anos no castiñeiro. Conta con preto de 100 publicacións nacionais e internacionais neste ámbito e ten participado nunha trintena de proxectos de investigación nacional e internacional no campo da sanidade vexetal.
A experta pon de relevo que o “Plan estratéxico do castiñeiro e da produción de castaña” elaborado pola Xunta de Galicia recoñece ao castiñeiro como una das árbores cunha maior variedade de aplicación e utilidades nos ámbitos rurais, polo que é “un recurso de gran relevancia desde o punto de vista da alimentación (humana, de animais domésticos e da fauna silvestre) e tamén polo seu valor para usos madeireiros”. Ademais, apunta que “o ecosistema creado nos soutos de castiñeiro ten valor como recurso turístico e paisaxístico, actúa como elemento de defensa contra os incendios, protexe o solo e serve de hábitat para numerosas especies”.
Lombardero salienta que todas estas funcións dos soutos de castiñeiro non se poden levar a cabo se os soutos non gozan dun bo estado sanitario. Nesta liña, indica que “desgraciadamente, na actualidade os castiñeiros están ameazados por unha serie de pragas e enfermidades invasoras, introducidas como consecuencia do movemento de material vexetal entre fronteiras”. Destas especies invasoras, sinala que as que están a causar maior dano son a tinta (Phytophthora cinnamoni) o chancro (Cryphonectria parasitica) e a avespiña do castiñeiro (Dryocosmus kuriphilus). Nos últimos anos producíronse avances notables no coñecemento da bioloxía destas especies, polo que se van incrementando as técnicas dispoñibles para reducir o seu impacto.
O cambio climático está a favorecer a proliferación das pragas
Ademais, a experta afirma que algunhas especies nativas tamén están a cobrar cada vez máis importancia, debido en parte ás condicións cambiantes derivadas do cambio climático e á crecente intensificación da produción da castaña. É o caso da antracnose do castiñeiro (Mycosphaerella maculiformis) e do escolítido Xyleborus dispar. Pola súa parte, os principais axentes daniños da castaña e que están a causar perdas significativas na súa produción son o Curculio elephas, a Cydia splendana e a Pamene fasciana. A castaña vese afectada así mesmo por fungos, en particular polo Gnomoniopsis castanea.
Na súa intervención, a investigadora vai abordar os principais problemas sanitarios do castiñeiro e da castaña, aportando recomendacións para reducir o seu impacto.
INSCRICIÓN para participar gratuitamente en todas as conferencias.
