A conselleira do Mar en funcións, Rosa Quintana, participou hoxe por videoconferencia na presentación do proxecto de cooperación Tanza: inclusión social, sector pesqueiro, economía circular, do que forman parte varios grupos de acción local do sector pesqueiro (GALP) de Galicia. Durante o encontro puxo en valor o importante labor que realizan estas entidades no desenvolvemento socioeconómico das zonas de pesca impulsando valores como a inclusión social.
Neste sentido, Rosa Quintana sinalou que Tanza é un claro exemplo do traballo destes grupos e do que se pode facer sumando sinerxías entre eles e neste caso tamén con entidades vinculadas co sector pesqueiro, como confrarías e empresas, e co ámbito da inclusión social, como centros ocupacionais ou centros especiais de emprego.
Deste xeito, a través da cooperación entre distintos GALP, Tanza busca promover unha maior empregabilidade de colectivos de inclusión social en actividades vinculadas coa economía do mar. Tamén ten entre os seus obxectivos crear unha conciencia activa no sector pesqueiro en relación ás problemáticas ambientais e da inclusión social e contribuír a un maior aproveitamento do programa de axudas por parte das entidades de inclusión social.
O proxecto no que participan os GALP Mariña-Ortegal, Ártabro Norte, Ártabro Sur, Costa da Morte, Costa Sostible e Ría de Arousa botará a andar nos vindeiros días coa fase de divulgación, que inclúe diferentes xornadas de presentación coa finalidade de establecer unha rede de contactos e detectar necesidades e oportunidades en relación a inclusión social. Despois analizaranse e valoraranse aquelas ideas que resolvan necesidades dos sectores do mar e xeren emprego para colectivos vulnerables e identificaranse os axentes interesados en levalas adiante.
Esta iniciativa é unha das tres aprobadas no marco da convocatoria de 2020 das axudas destinadas a proxectos de cooperación interterritoriais e transnacionais dos GALP no marco do Fondo Europeo Marítimo e de Pesca e conta cun apoio de algo máis de 108.700 euros. A través deles a Consellería do Mar busca estimular a cooperación dos grupos para que accedan a información e novas ideas e aprendan doutros grupos, rexións ou países. O obxectivo principal é a suma de sinerxías e a integración entre grupos. Tamén busca impulsar e apoiar a innovación e adquirir destrezas e medios que permitan mellorar as súas Estratexias de Desenvolvemento Local Participativo.
OS GALP
Os grupos de acción local do sector pesqueiro (GALP) dan continuidade aos antigos grupos de acción costeira (GAC) e son asociacións sen ánimo de lucro colaboradoras da Consellería do Mar como axentes de desenvolvemento na aplicación da Estratexia de Desenvolvemento Local Participativo da zona pesqueira e na xestión e control das axudas que se tramitan para o desenvolvemento desa estratexia.
A actividade dos oito grupos que hai en Galicia dentro do programa operativo do Fondo Europeo Marítimo e de Pesca contribúe a mellorar a transformación, comercialización e posta en valor das producións pesqueiras, ao desenvolvemento dun sector turístico sustentable, á creación de empresas e a xeración de emprego e á diversificación do sector a través de iniciativas complementarias da actividade pesqueira como o turismo mariñeiro. Tamén contribúe á conservación e valorización do patrimonio natural e cultural marítimo-pesqueiro.
En canto aos proxectos desenvolvidos por cada un dos oito grupos, desde a primeira convocatoria de axudas a estes proxectos, do ano 2016 e ata o 31 de decembro de 2019, desenvolvéronse 387 iniciativas que contaron cun total de axuda pública de preto de 25 millóns de euros, que catalizaron máis de 34 millóns de euros de investimento privado. Isto supuxo un investimento total de preto de 60 millóns de euros.
