A Xunta de Galicia vén de adxudicar por un importe próximo aos 85.000 euros a redacción do Plan Director do Parque do Pasatempo de Betanzos. Así o anunciaron hoxe a directora xeral de Patrimonio Cultural, María del Carmen Martínez Insua, e o delegado territorial da Xunta na Coruña, Gonzalo Trenor, nunha visita a Betanzos na que explicaron que este novo documento sentará as bases para levar a cabo as actuacións necesarias para garantir a conservación e posta en valor deste Ben de Interese Cultural (BIC) coa categoría de xardín histórico.
Neste senso, a representante da Consellería de Cultura, Educación e Universidade sinalou que a contratación desta redacción enmárcase no firme apoio da Xunta de Galicia co Parque do Pasatempo e coa vila de Betanzos. Un apoio que, tal e como lembrou, “quedou demostrado co traballo feito por parte da Administración autonómica para favorecer e facilitar a declaración BIC deste espazo”, declaración aprobada polo Goberno galego en 2020, e que volve a reflectirse con esta adxudicación.
Así, nunha nova mostra deste compromiso, o Goberno galego impulsa a elaboración dun documento que permita afondar no seu coñecemento e nas súas condicións actuais para definir as liñas de actuación que se porán en marcha no futuro no eido da súa conservación. Para isto, o adxudicatario contará cun prazo de 15 meses para elaborar un texto técnico no que se recolla un análise detallada do conxunto desde as perspectivas histórica, arqueolóxica, arquitectónica e espacial do monumento e do seu contorno, así como da conservación e restauración dos seus elementos artísticos. Este plan terá en conta, ademais, a súa xestión para a posta en valor e uso cultural dunha forma racional e sostible.
“Trátase dun traballo complexo e completo”, advertiu María del Carmen Martínez Insua antes de engadir que se precisa dun equipo técnico multidisciplinar e especializado e que incluirá propostas de monitorización, toma de datos, análises e avaliacións co fin de coñecer con exactitude cales son as necesidades do Parque do Pasatempo para definir as actuacións necesarias para garantir a conservación deste ben tan senlleiro. Concretamente, o equipo técnico que se vai encargar da redacción do Plan Director está composto por arquitectos, historiadores da arte, restauradores, arqueólogos, enxeñeiros e especialistas en xardinaría, botánica e paisaxe.
XARDÍN HISTÓRICO
O Parque do Pasatempo, declarado Ben de Interese Cultural coa categoría de xardín histórico, é un xardín eclético creado por Juan Naveira no que se mestura vexetación, arquitectura, escultura, pintura, enxeñería hidráulica, fontes e estanques, cunha vocación de parque temático e didáctico que responde á tradición filantrópica dos indianos que regresaron de América a finais do século XIX.
