Os socialistas ourensáns conseguiron o respaldo da oposición para instar ao goberno local a reabrir o Museo Municipal, pechado desde outubro de 2021. Ademais da súa reapertura, a proposta plantea a ampliación das instalacións a través da adquisición da Casa das Cadeas e a posta en marcha dun ambicioso programa educativo.
"Propoñemos un enfoque educativo que inclúa programas dirixidos a estudantes de todos os niveis, así como colaboracións con universidades e centros de investigación para fomentar o estudo da historia local", sinalou a edil socialista Alba Iglesias. Segundo a concelleira, o museo debe converterse nun referente cultural e un espazo de encontro entre a comunidade académica e o público en xeral.
Iglesias destacou a importancia de garantir a calidade e o atractivo das exposicións a través da colaboración con expertos en historia, arqueoloxía e museografía. "Queremos que o museo sexa un espazo innovador e accesible, que combine rigor académico con elementos interactivos e multimedia", afirmou.
A edil socialista lamentou o peche do museo en 2021 e as propostas alternativas do goberno local, que consideraba "desvirtuaban" o carácter do edificio. "Este espazo renacentista, restaurado en 1985, merece ser recuperado e posto ao servizo da cidade", concluíu.
