'Cantigas Transhumantes', o seu segundo disco, despois de 'Renacer', comezou a xestarse no 2016, cando a instancias dun amigo, Miriam Sandoval iniciou unha investigación sobre poetas galegos, buscando libros nas bibliotecas e facendo maquetas. Este traballo discográfico, con letras de bardos que tiveron que deixar a súa terra no século XX, amosa nos seus poemas musicados como se viviu o fenómeno migratorio desde o punto de partida.
De Celanova, escolleu a Celso Emilio Ferreiro en Venezuela con "Eiquí será" / "Samba"; do ourensán Eduardo Blanco Amor, en Arxentina, "O furto"; de Noia, Antón Avilés de Taramancos en Colombia, "As moradías do vento"; e de Lorenzo Varela, aquel que naceu a bordo do vapor "La Navarra," a pouco de chegar á Habana, no que viaxaban os seus pais, procedentes de Monterroso, que logo estivo en México, Arxentina e Uruguai. Miriam tamén escolleu "Castelao" de Francisco Luis Bernárdez (Arxentina) e inspirouse na inesquecible ourensá Pura Vázquez, entre outros escritores.
Miriam, que naceu en Avellaneda (Bos Aires), vive e traballa en Galicia desde 1995, na terra da maioría dos poetas aos que lles puxo voz. Aquí, continúa cunha carreira musical que iniciara aos 11 anos na súa Arxentina natal, onde formou parte do grupo de Músicos de Outubro "La Bidú Tango". En Galicia, colaborou con "Son de Seu," "Virandeira," "Folk," e "Aphonic."
O próximo día 16 de agosto, coincidindo coas Festas de San Roque en Vigo, presentará 'Paisaxes Sonoras', un tributo aos poetas galegos en Sudamérica, onde interpretará cunha capacidade vocal e habilidade para transmitir emocións profundas, así como composicións propias. O seu estilo fusiona ritmos tradicionais como Tango, Bossa Nova, Chacarera, Candombe e Bolero con arranxos modernos. Estará acompañada por Juan Sánchez Santomé no baixo, Diego Martínez Guido no piano, e Juan Guerrero na batería.
