O martes, 4 de febreiro, ás 19.00 h, o Ateneo de Santiago acollerá a proxección da película Malencolía, dentro do ciclo Cinema galego do século XXI do Cineclub Ateneo.
O acto terá lugar, como no resto de sesións do cineclub, na rúa do Vilar, 19, en Santiago, e contará coa presenza do seu director, Alfonso Zarauza, quen presentará o filme e participará nun coloquio posterior co público asistente.
Malencolía (2021) conta a historia de Sira e Pepe, unha parella que, tras vivir dez anos en Berlín, decide regresar a Galicia en busca dun novo comezo. Para iso, compran unha casa nunha aldea que consideran abandonada, pero na que atopan a presenza inesperada dunha misteriosa veciña. A película, con tintes de thriller e drama psicolóxico, explora o enfrontamento entre o rural e o urbano, os medos e as tensións que xorden no proceso de cambio de vida.
Alfonso Zarauza, director e guionista compostelán, conta cunha ampla traxectoria no audiovisual galego. Ademais de Malencolía, é responsable de longametraxes como La noche que dejó de llover (2008), Encallados (2013), Los fenómenos (2014) ou Ons (2020), obras premiadas en festivais internacionais e recoñecidas nos Premios Mestre Mateo. Cunha carreira que abrangue ficción, documental, curtametraxes e videoclips, Zarauza caracterízase por un estilo cinematográfico comprometido e persoal, explorando a identidade, os conflitos sociais e a paisaxe galega desde unha perspectiva única.
