O Presidente da Deputación de Lugo, José Tomé Roca, entregoulle este mércores o Premio Otero Pedrayo a Darío Villanueva nun acto que acolleu o Salón de Actos do Pazo de San Marcos, ao que tamén asistiron a Deputada de Cultura, Patrimonio Histórico Artístico e Normalización Lingüística, Iria Castro, a Deputada de Muller e Igualdade, Marisol Morandeira, e o Deputado de Medio Ambiente, Carlos López.
José Tomé felicitou ao premiado recoñecendo a súa traxectoria e valía como profesor, filólogo, escritor, experto en cine e poesía, “agudo articulista e autor de interesantes reflexións sobre as cidades”. “Dicir que Darío Villanueva é un dos grandes intelectuais galegos do noso tempo é pouco máis que unha obviedade, e apenas lle fai xustiza á súa biografía”, asegurou o Presidente, quen engadiu que, “sobre todo, é unha persoa volcada no estudo, na comprensión e no coidado do logos”.
O mandatario provincial lembrou que o Otero Pedrayo “é un premio itinerante, un peregrino que viaxa sen descanso entre as catro deputacións. Un símbolo do compromiso das administracións locais coa cultura, e unha boa demostración de que a cultura nace de abaixo arriba, por todos os recunchos do noso territorio”.
A Deputación de Lugo fora por última vez escenario da entrega deste galardón no ano 2019, cando recibiron Ramón Villares e Paco Martín esta distinción. Este premio ten como obxectivo perpetuar e honrar a memoria de Otero Pedrayo, recoñecer a contribución eminente á cultura e promover os valores propios de Galicia e as obras que leven ao esclarecemento e á mellora da cidadanía e das institucións.
“Otero Pedrayo foi un construtor da nación galega, unha nación no mundo e por iso para nós, dende a área de cultura de Vicepresidencia da Deputación de Lugo, é un pracer colaborar co Premio Otero Pedrayo conxuntamente coas outras tres deputacións e mais a Xunta e, este ano, como institución anfitrioa, é unha honra”, sinalou na intervención inaugural a deputada Iria Castro.
A responsábel provincial parabenizou a Darío Villanueva, elixido para recibir o galardón polo xurado, formado por representantes das institucións organizadoras e taménpolas tres universidades, a RAG, o Instituto Padre Sarmiento e a Fundación Otero Pedrayo.
“Un lucense de Vilalba que, como Ulises, busca, escribe e estuda outros universos pero sempre retorna a Vilalba en busca das orixes. Darío villanueva é académico, crítico literario, profesor universitario, escritor. Doutor de Teoría de Literatura e Literatura Comparada da USC. Foi decano da facultade de Filoloxía da USC e posteriormente reitor da USC. Ademais, tamén foi director da RAE, doutor honoris causa por 14 universidades de Europa, América e Asia e sobre todo, gustaríame destacar que é un estudoso de literatura, con varios libros dedicados ao estudo da obra de Emilia Pardo Bazán ou Rafael Dieste. En nome propio e desta Deputación, os nosos sinceros parabéns a Darío Villanueva pola súa traxectoria e por este galardón”, dixo Iria Castro.
“Contanque estando Don Ramón no leito de morte, visitouno o ministro de educación e el díxolle: Señor Ministro, salve o grego. O día de deliberación do xurado preguntámonos que pensaría Don Ramón e eu téñoo moi claro. Diría, Señor Ministro, salve o galego. Salvar o galego é salvar a memoria e o traballo de galeguistas como Don Ramón, é salvar a universalidade do noso pobo, a cultura, os clásicos, as cantigas de amigo, os poemas de Rosalía, a memoria de todas as coplas que chegaron ata o día de hoxe. Contamos con Darío Villanueva, un galego feito de palabras, de etimoloxía, de saberes, para esta labor”, concluíu a deputada.
A música de MJ Pérez marcou a sonoridade dun acto conducido pola actriz e directora de teatro Tareixa Campo e o no que tamén interviron o presidente da Deputación, José Tomé e o secretario xeral de Política Lingüística Valentín García, e que contou coa presenza de representantes institucionais das deputacións e das entidades culturais que colaboran na organización do Premio.
CONTRIBUCIÓN NO CAMPO DAS LETRAS
Darío Villanueva (Vilalba, 1950) é catedrático de Teoría da Literatura e de Literatura Comparada da Universidade de Santiago de Compostela, institución da que foi reitor entre 1994 e 2002. No ano 2007 ingresou na Real Academia Española, que chegou a presidir entre o 2014 e 2018, e desde 2015 forma parte do xurado do Premio Princesa de Asturias das Letras. Autor de medio centenar de libros sobre crítica e teoría da literatura, publicou ensaios sobre escritores como Valle-Inclán, Azorín, Torrente Ballester, Camilo José Cela ou Emilia Pardo Bazán.
PREMIO
O Premio Otero Pedrayo, dotado cada ano con 16.000 euros, está promovido polo Goberno galego e as catro deputacións provinciais. Considerado un dos máis prestixiosos da cultura galega, naceu en 1977 co obxectivo de perpetuar a memoria de Ramón Otero Pedrayo; recoñecer a contribución á cultura de persoas e entidades no campo das letras, e promover os valores propios de Galicia e as obras que leven ao esclarecemento e á mellora da súa cidadanía e institucións.
