A xornada deste domingo é a máis importante da Festa do Viño do Condado na súa 64 edición. Hoxe coñeceranse os viños deliciosos do ano que o panel de cata puntuou na mañá do sábado.
A casa do Concello énchese de confrarías convidadas a partir das 11 horas e a Confraría do Viño do Condado do Tea e Espumosos, anfitrioa, vai nomear novos confrades.
Despois todas as confrarías desfilan cara ao recinto amurallado, lucindo as súas vestimentas coloridas e variadas, trala foto de rigor nas escaleiras da Casa do Concello salvaterrense.
Contra as 13.00 horas, o humorista televisivo Roberto Vidal pronunciará o pregón que promete ser moi divertido.
Logo haberá tempo para degustar os viños das adegas da DO Rías Baixas cos mellores albariños e Condados, xunto con produtos da terra, na ampla explanada do recinto amurallado.
As confrarías celebran un almorzo de confraternidade ao que asisten os confrades convidados na Casa do Viño ou Casa do Conde.
Diversas actuacións musicais alegran a festa durante todo o día. Pola noite, terceira e derradeira noite gastronómica para volver a desfrutar dos caldos do Condado e os produtos da terra.
