A Real Academia Galega de Ciencias (RAGC) e a Universidade Intercontinental da Empresa (UIE) entregaron os “Premios RAGC-UIE para investigadoras e investigadores novos” nun acto celebrado no Centro Obra Social ABANCA, en Santiago. Estes galardóns buscan impulsar a investigación científica en Galicia, recoñecendo e potenciando as traxectorias de novos investigadores que desenvolven a súa carreira na comunidade.
Na categoría de Ciencias Básicas, a premiada foi Beatriz Pelaz (USC), polo seu traballo no desenvolvemento de nanomateriais para fármacos máis eficientes. En Ciencias Técnicas, distinguiuse a Belén Riveiro (UVigo) pola súa investigación na avaliación de estruturas de enxeñaría civil mediante intelixencia artificial, previndo colapsos en pontes, estradas e vías férreas. En Ciencias Sociais, o recoñecemento foi para Cristina Gómez (USC), que estuda o comportamento das persoas en contextos de crises sociais e políticas. Cada premio está dotado con 5.000 euros, ademais de varios accésits.
O acto contou coa presenza do reitor da UIE, Miguel Ángel Escotet, o presidente da RAGC, Juan Lema, o conselleiro de Educación, Ciencia, Universidades e Formación Profesional, Román Rodríguez, e outras autoridades políticas, culturais e académicas galegas.
Juan Lema destacou o optimismo sobre a evolución da investigación en Galicia e a “forza da ciencia en feminino”, salientando os “brillantes” currículos das máis de 60 candidaturas presentadas. Miguel Ángel Escotet enfatizou a intención de “recoñecer e fomentar o traballo das persoas investigadoras máis novas, promovendo o coñecemento científico”, e subliñou o alto número de candidaturas femininas (39 de 63) e o recoñecemento do xurado ao traballo de sete mulleres.
Ademais das premiadas, concedéronse accésits a Susana Ladra (UDC) en Ciencias Básicas, por algoritmos e estruturas de datos aplicados á recuperación de información e bioinformática; a Iria Gómez (CiMUS-USC) tamén en Ciencias Básicas, polo seu traballo sobre a diabetes tipo 1; a Sara González (USC) en Ciencias Técnicas, pola súa investigación en economía circular e análise da sustentabilidade; e a Ariadna Monje (UDC) en Ciencias Sociais, polos seus estudos sobre emprendemento e turismo.
