Este vindeiro luns, 17 de marzo, ás 19:30 horas, o Ateneo de Santiago organiza na Rúa do Vilar, 19, unha conferencia titulada «Educar en cidadanía: un compromiso co futuro», impartida por José Antonio Caride, Catedrático de Pedagoxía e Didáctica da USC. A charla enmárcase dentro da IV Mostra Internacional de Cine e Educación (CINEDUCA), co obxectivo de reflexionar sobre o papel da educación na construción dunha cidadanía crítica, responsable e participativa.
A intervención abordará o concepto de cidadanía desde unha perspectiva educativa, poñendo o foco en aspectos fundamentais como os valores, os dereitos e deberes, o respecto ás diferenzas e o sentimento de pertenza a unha comunidade. A educación, en todas as súas etapas, ten un papel fundamental na formación dunha cidadanía activa, capaz de enfrontar os desafíos do mundo contemporáneo. O poñente analizará as estratexias e ferramentas que poden axudar a integrar estes principios no sistema educativo, así como o papel do cinema como recurso pedagóxico para promover debates e reflexións sobre a sociedade actual.
José Antonio Caride, Doutor en Filosofía e Ciencias da Educación, é un referente no estudo da Pedagoxía Social e a Educación para a Cidadanía. Ao longo da súa extensa traxectoria académica, impartiu docencia en máis de 30 universidades internacionais e dirixiu múltiples proxectos de investigación sobre políticas educativas, dereitos humanos e desenvolvemento comunitario. Autor de máis de 450 publicacións, colabora con diversas axencias de avaliación científica e ten recibido numerosos recoñecementos pola súa contribución á educación e á pedagoxía social.
