A Xunta urxe ao Goberno de España unha planificación técnica e económica decidida para impulsar a conexión ferroviaria entre Vigo e Porto.
O director xeral de Mobilidade, Ignacio Maestro, interveu hoxe na “Xornada de Presentación da Estrutura Conxunta de Colaboración Loxística na Eurorrexión”.
Ignacio Maestro incidiu na necesidade de que a conexión ferroviaria entre Vigo e Porto sexa declarada como Rede Básica e parte do Corredor Atlántico co obxectivo de conseguir o seu impulso e finalización canto antes, sinalando que non é suficiente con incluír esta conexión na Rede TENT-T como “Rede Básica ampliada”, que fixa o horizonte temporal en 2040.
Na súa intervención, o director xeral de Mobilidade instou ao Goberno central a trasladar un plan inequívoco para esta conexión, similar ao declarado polo Executivo luso, co fin de poder impulsar e avanzar nesta actuación estratéxica para a competitividade económica de Galicia.
Lamentou que a falta de avances por parte do Goberno de España nos trámites para executar a infraestrutura entre Vigo e a fronteira portuguesa en alta velocidade fai actualmente imposible aspirar á súa posta en servizo antes do 2033, tal como ratifican os estudos acometidos pola Xunta, con tres anos de retraso en relación á parte lusa.
Lembrou que a inclusión nos corredores ferroviarios achegan a posibilidade inédita de acceder a unha fonte extraordinaria de financiamento, o mecanismo Conectar Europa, para a modernización da rede de ferrocarril.
Neste sentido, insistiu na necesidade de que o Goberno de España cree o Comisionado do Corredor Atlántico, defina o Plan Director e, de forma consensuada coas comunidades autónomas do noroeste, impulse os proxectos máis prioritarios para o fortalecemento da rede ferroviaria de mercadorías.
Apuntou que iniciativas como Cologistics facilitan o traballo coordinado entre administracións, co tecido empresarial e os axentes sociais para incrementar a cohesión territorial e facer da posición xeográfica periférica de Galicia unha gran virtude en termos de competitividade, aproveitando a súa condición de porto da fachada atlántica.
Así, concretou que a combinación das liñas A Coruña-Vigo-Ourense-Monforte-León e a conexión de Vigo con Porto permitirían multiplicar a capacidade loxística das empresas da Eurorrexión.
Un obxectivo, precisou, que será posible grazas a acurtar o tempo de viaxe entre todas as poboacións da fachada atlántica, deixando, por exemplo, a unha hora a Vigo e Porto.
