A Deputación de Pontevedra entregou este martes os primeiros Premios Sociais, un certame destinado a recoñecer o labor de persoas, entidades e proxectos que destacan na provincia polo seu traballo a favor dos dereitos da cidadanía e dos colectivos máis vulnerables.
A Asociación Española contra o Cancro, a Federación Down Galicia e Xosé Carlos González Blanco, da Asociación Xerome Emiliani, foron os galardoados nesta primeira edición. O presidente da Deputación, Luis López, destacou o papel fundamental do tecido asociativo na atención ás necesidades da poboación, especialmente nos casos en que o servizo público non chega.
A gala, celebrada no Salón de plenos do Pazo provincial, contou coa actuación de danza da Fundación Igual Arte e coa entrega de galardóns fabricados polos usuarios da Asociación Juan XXIII. A deputada de Benestar Social, Sandra Bastos, subliñou o obxectivo destes premios: "poñer en valor o inmenso esforzo que levades a cabo tanto profesionais como distintas entidades que dedicades o voso tempo, coñecemento e destrezas para mellorar a calidade de vida da xente".
Luis López anunciou un incremento ata o medio millón de euros do orzamento destinado a axudas para entidades sen ánimo de lucro, así como a creación de novos programas e iniciativas sociais. "Este xesto de agradecemento susténtase en varios porqués", explicou o presidente, "porque as persoas e entidades que estades aquí dedicades o voso tempo, traballo e recursos a axudar a outras persoas, unha vocación altruísta que é digna de eloxio e admiración".
A Deputación reafirma o seu compromiso co benestar social da provincia, recoñecendo e apoiando o labor das entidades que traballan por unha sociedade máis xusta e inclusiva.
