O presidente do Goberno galego, Alberto Núñez Feijóo, constatou hoxe que Galicia está a conter a pandemia e salientou que a Xunta recibiu xa 30.000 test de dobre banda que adquiriu e que permiten detectar os positivos activos e os inmunizados. “A evolución da curva está a ser boa. Podemos dicir que estamos contendo a pandemia e debemos seguir traballando co mesmo rigor”, aseverou, despois de analizar onte co comité clínico a evolución da pandemia e as perspectivas para as vindeiras semanas.
Ao longo da rolda de prensa, Feijóo resaltou que o Plan de continxencia en marcha baixou do nivel 3 ao nivel 2. “Actualmente atopámonos cunha estabilización das urxencias, cunha diminución dos casos de hospitalización e cunha redución intensa de máis do 20% dos pacientes que ocupan as UCI, polo que o comité clínico propón desactivar a fase 3 e dar por concluída, de momento, a fase aguda da crise do coronavirus en Galicia”, explicou, reiterando que a Comunidade non pode baixar a garda e debe seguir planificando e actuando con responsabilidade.
Nesta liña, incidiu en que é imprescindible contar con test fiables, non só para detectar positivos, senón para saber cales son positivos activos e cales inmunizados. “É vital para evitar novos contaxios”, abundou, explicando que nas próximas horas os expertos tomarán a decisión sobre o protocolo que precise como e onde empregar os test de dobre banda que a Administración autonómica acaba de adquirir.
Así mesmo, o titular da Xunta avanzou a realización dun estudo epidemiolóxico nunha porcentaxe considerable da poboación galega para ter estimacións fiables e afrontar as vindeiras semanas. Ao respecto, precisou que os expertos xa están traballando, co obxectivo de que nos próximos días se poida anunciar o contido e alcance desta “enquisa epidemiolóxica”, da que se poderán obter os datos sobre porcentaxe de positivos, así como estimacións fiables de canta xente pasou o coronavirus e que porcentaxe está inmunizada.
Ante a necesidade de redobrar as prevencións para que non haxa un rebrote, Feijóo referiuse tamén ao problema de desabastecemento nos centros de traballo, reiterando que, co obxectivo de dar seguridade, a Xunta acordou facilitar aproximadamente 900.000 máscaras semanais –durante dúas semanas- para as empresas e os autónomos que o soliciten, a prezo de custo da Administración autonómica.
“E esta mesma semana repartimos outras 20.000 máscaras no sector pesqueiro”, engadiu, que se suman ás 500.000 que cada semana utiliza o Sergas e a case un millón que se distribuíron para dar seguridade ás residencias, así como aos concellos.
Feijóo fixo fincapé na importancia de ter datos para coñecer a situación real, especialmente nas residencias de maiores e de discapacitados internos, que seguen a ser unha das prioridades de atención da Xunta. “E por iso levamos feitos test masivos como a mellor fórmula para atacar este virus nas residencias”, afirmou, reiterando a necesidade de que o Goberno central facilite os datos de todas as autonomías para facer comparacións homoxéneas e contar cunha información transparente e fiable.
NO PARLAMENTO
Ao longo da rolda de prensa, o presidente do Goberno galego asegurou que volverá solicitar a súa comparecencia no Parlamento, ante a Deputación Permanente, para informar aos grupos parlamentarios da evolución do COVID-19. E avanzou que, esta mesma tarde, terá lugar a primeira reunión do comité de expertos económicos que asesora á Xunta ante o impacto que a pandemia terá na economía.
Debido ao alcance deste duro escenario, Feijóo explicou que o comité determinará de xeito inmediato o impacto económico que os estados de alarma e de emerxencia sanitaria e as súas medidas de restrición van ter na economía galega, especialmente naqueles sectores que maior riqueza e emprego aportan á nosa Comunidade.
Así mesmo, o comité analizará os posibles escenarios de saída da crise, tendo en conta a previsión de caída do PIB e dos ingresos tributarios de todas as administracións; así como o impacto que suporá no déficit público e, polo tanto, no incremento da débeda pública. De igual xeito, avaliará o impacto das medidas económicas xa adoptadas polas distintas administracións para decidir cales son as mellores prácticas e así propoñer novas medidas laborais e fiscais para a reactivación económica. “Temos que prepararnos para a situación económica e queremos facelo con serenidade, determinación e con unidade dos expertos, e sei que tamén dos galegos”, concluíu.
