Galicia acollerá en novembro o congreso CIBER.gal, impulsado polo Nodo Galego de Ciberseguridade (CIBER.gal) e orientado á seguridade da información no tecido empresarial, na cidadanía e nas Administracións Públicas. Así se anunciou esta semana durante o evento do terceiro aniversario do centro de innovación TEGRA Cybersecurity Center.
O evento CIBER.gal, que terá lugar os días 10 e 11 de novembro na Cidade de Cultura de Galicia de xeito presencial e en streaming e ofrecerá obradoiros, conferencias e paneis de debate nos que participarán institucións nacionais e autonómicas referentes neste campo, poñentes de recoñecido prestixio no ámbito tecnolóxico, axentes clave da investigación e o coñecemento en ciberseguridade e as principais empresas tecnolóxicas de Galicia. Proximamente será publicada na súa web máis información ao respecto do cartel e a organización.
O Nodo Galego de Ciberseguridade CIBER.gal foi constituído en xullo de 2020 como un espazo de cooperación público privado no campo da ciberseguridade e fundado polo Instituto Nacional de Ciberseguridade (INCIBE), o Centro Criptolóxico Nacional (CCN), as catro Deputacións galegas, a Federación Galega de Municipios e Provincias e a Axencia para a Modernización Tecnolóxica de Galicia (Amtega) da Xunta de Galicia.
Desde a súa constitución CIBER.gal sostén un obxectivo claro, fomentar a innovación no eido da ciberseguridade. De aí que a súa intervención no evento anual de TEGRA estivera marcada pola exposición das medidas mais recentes neste ámbito.
Destacan entre elas iniciativa CybersSandbox para o fortalecemento das capacidades de ciberseguridade das pemes e o impulso da industria de ciberseguridade, no marco do Plan de Recuperación, Transformación e Resiliencia, para pilotar de forma áxil solucións que dean resposta a retos identificados de forma previa co sector da ciberseguridade e das das que se poidan beneficia un número relevante de pemes, micropemes e autónomos de Galicia. Tamén se puxo de relevancia o apoio prestado pola Amtega, como entidade pública propulsora do nodo CIBER.gal é unha das fundadores do nodo.
TEGRA
TEGRA Cybersecurity Center é un centro de innovación creado en 2018 da man de Telefónica e Gradiant e apoiado pola Xunta de Galicia a través da Axencia Galega de Innovación GAIN coa misión de mellorar a seguridade da información das empresas a través da tecnoloxía e situar a Galicia como un axente relevante no ámbito da ciberseguridade, ademais de crear emprego cualificado neste sector de gran demanda e potencial crecemento.
O seu obxectivo é desenvolver produtos e servizos para mellorar a seguridade da información das empresas mediante técnicas criptográficas avanzadas, deseñar mecanismos de comprobación da identidade no acceso á información e ferramentas de análise de datos, ademais de sistemas de clasificación de documentación e de detección de accesos irregulares á información.
Entre os seus últimos logros destacan a solución Stela Filetrack, co fin de protexer a información documental sensible nas organizacións, e a ferramenta FARO, para a detección de información sensible en documentos.
No evento do terceiro aniversario de TEGRA, presentáronse os resultados deste centro no relativo á innovación en ciberseguridade e expúxose a Estratexia de Potenciación de I+D+i en ciberseguridade en España
