O Museo de Pontevedra inicia as conmemoracións do Ano Castelao cunha programación especial

O Museo de Pontevedra arranca este martes, 7 de xaneiro, as actividades conmemorativas do Ano Castelao, que lembra o 75 aniversario do seu pasamento. A programación inaugural inclúe unha visita guiada especial ás 18:00 horas ás salas dedicadas ao artista, seguida ás 19:30 horas dunha sesión de cine e música coa proxección de ‘Castelao: de chumbo a verba’ e a actuación de María do Ceo.

A visita guiada percorrerá as dúas salas que exhiben unha parte das máis de 1.800 obras de Castelao que conserva o Museo. Nelas, revísase a súa faceta de artista, pero tamén as de escritor e político galeguista, aspectos inseparables da súa figura. A visita, cunha duración aproximada de 60 minutos, repetirase o primeiro martes de cada mes ao longo deste ano. Requírese inscrición previa a través dun formulario dispoñible na web do Museo.

Ás 19:30 horas comezará a sesión de cine e música. A música correrá a cargo de María do Ceo, destacada voz que conecta Galicia e Portugal. Nada no Porto, desenvolveu a súa carreira artística no fado, ao que segue dedicada. Desde Cartas de Amor (1997), o seu primeiro disco, leva realizado centos de concertos e publicado catorce álbums que conforman un itinerario emocional con múltiples recoñecementos a ambos lados do Miño.

A continuación, proxectarase ‘Castelao: de chumbo a verba’, un documental ficcionado que mestura a época actual, os anos centrais da vida de Castelao e imaxes de arquivo para facilitar a comprensión do seu pensamento e a súa dimensión cultural e política. Dirixido por Miguel López en 2017, conta con Miguel Pernas, Uxía Blanco e Iago Novoa no elenco e ten unha duración de 60 minutos.

Máis actividades polo Ano Castelao

O Museo de Pontevedra desenvolverá ao longo do ano outras accións conmemorativas. O Museo custodia a maior parte da obra artística de Castelao, ademais da súa biblioteca persoal e importante documentación sobre esta figura clave para entender o século XX en Galicia desde o punto de vista artístico, literario e político.

Ademais das actividades presenciais, o Museo lembra que ten dispoñibles na súa web varias opcións para achegarse á obra de Castelao:

• Explorar as obras da súa colección
• Realizar unha visita virtual polas salas do Museo
• Descargar en PDF o libro ‘Esenciais. Castelao no Museo de Pontevedra’: