Galicia despediu o ano 2023 cun mes de decembro cálido e normal en canto ás precipitacións

Galicia rematou 2023 cun mes de decembro cálido en canto ás temperaturas e dentro da normalidade no que respecta ás precipitacións rexistradas. Así se recolle no avance do último informe climatolóxico mensual elaborado por Meteogalicia e que foi publicado hoxe mesmo.

Neste sentido, o último mes do ano non presentou grandes anomalías aínda que si tivo dúas partes climatoloxicamente ben diferenciadas. Así, a primeira quincena viu marcada por precipitacións importantes sobre todo na fachada Atlántica e temperaturas altas para a época; mentres que nas últimas dúas semanas predominaron as situacións anticiclónicas, que deixaron menos chuvia e xornadas de frío intenso polas noites.

En canto á temperatura media, situouse 0,3 graos por riba do esperado tendo en conta os rexistros obtidos nas estacións galegas máis representativas durante o período de referencia 1981-2010, o que fai que se considere un mes cálido no conxunto de Galicia. Con todo e malia que non houbo grandes anomalías térmicas, os valores mínimos foron algo máis altos do agardado, cunha desviación de 0,6 graos con respecto á media.

Por zonas, as temperaturas medias mínimas máis baixas en decembro oscilaron entre 0,4 e 1,4 graos en gran parte da provincia de Ourense mentres que os valores máis altos das máximas —entre 14,4 e 14,9 graos— rexistráronse na fosa Padrón-Tui, nos arredores do Golfo Ártabro e na Mariña lucense central e oriental.

Da análise das precipitacións conclúese que decembro foi un mes normal en moitos puntos da Comunidade, apenas un 3% por debaixo do valor climático habitual. A chuvia media acumulada foi de 187 l/m2 e o precedente máis seco foi decembro de 2018.

No relativo á distribución das chuvias, os valores máis altos concentráronse nas serras litorais —entre 340 e 410 l/m2— mentres que os máis baixos rexistráronse en puntos da Mariña lucense, no sur de Lugo e no sur e leste da provincia de Ourense.