A vicepresidenta da Deputación de Pontevedra, Luisa Sánchez, e Alice Finot no afterwork do Círculo de Xóvenes Emprendedores en Vigo

A vicepresidenta da Deputación de Pontevedra, Luisa Sánchez, participou hoxe nun afterwork organizado polo Círculo de Xóvenes Emprendedores (CIJE) na súa sede de Vigo, xunto á deportista francesa afincada en Vigo, Alice Finot, quen actuou como conferenciante principal. Durante o evento, Sánchez destacou o gran mérito de Finot, que recentemente se estreou na elite olímpica ao competir nos Xogos Olímpicos de París 2024, onde quedou ás portas do podio nos 3.000 metros obstáculos, cunha marca histórica en Europa. "Alice demostra que os soños, cun esforzo e dedicación constantes, se poden alcanzar", sinalou a vicepresidenta, subliñando a importancia de apoiar ao talento e ao deporte.

Sánchez aproveitou tamén a ocasión para anunciar o compromiso firme da Deputación co deporte, destacando que para 2025 se incrementará un 15% o orzamento destinado a este sector, alcanzando máis de seis millóns de euros, aos que se suman outros oito millóns do segundo Plan Extraordinario de Infraestruturas Deportivas. "Estamos traballando arreo para converter a provincia de Pontevedra no gran estadio deportivo do mundo", asegurou, reforzando o compromiso da institución por fomentar o deporte e a actividade física en toda a provincia.