O Porriño, epicentro do ciclismo de montaña con máis de 700 participantes
Os montes de Budiño converteranse os días 12 e 13 de abril de 2025 no escenario do V Trofeo XCO Concello do Porriño e o VIII Trofeo Mini BTT Concello do Porriño, un evento que reunirá a máis de 700 ciclistas e unha previsión de 2.000 asistentes.
A presentación oficial tivo lugar no Centro Cultural A Forna de Budiño, coa presenza do alcalde Alejandro Lorenzo, o concelleiro de Deportes Abel Estévez, o presidente da AD Avanza David García e numerosos ciclistas do club.
O sábado 12 pola tarde celebrarase a proba XCO, incluída no calendario da Real Federación Española de Ciclismo e dirixida a participantes a partir de 12 anos, puntuando para o ranking nacional. O domingo 13 pola mañá, o Mini BTT, do calendario da Federación Galega de Ciclismo, reunirá a nenos e nenas menores de 12 anos.
O alcalde Alejandro Lorenzo destacou a relevancia do evento para o municipio, afirmando que "se consolida ano tras ano como unha cita indispensable no calendario deportivo do Porriño, impulsando o deporte base e de competición, e dinamizando a economía e sociedade local, especialmente en Budiño".
O concelleiro de Deportes, Abel Estévez, puxo en valor o traballo organizativo e o alto nivel de participación, destacando que "é un orgullo colaborar coa Asociación Deportiva Avanza para seguir facendo do Porriño un referente no deporte galego e estatal".
Durante o evento, habilitarase unha zona específica para equipos e carpas, con técnicos, xuíces e persoal de apoio para garantir o correcto desenvolvemento das probas e a seguridade de participantes e asistentes.
O Concello do Porriño invita a toda a cidadanía a gozar dunha fin de semana chea de deporte, natureza e convivencia nos montes de Budiño.