Neira Vilas homenaxeado no seu cuarto cabodano do seu pasamento

A Fundación Xosé Neira Vilas celebrou este martes na

localidade de Gres, no concello pontevedrés de Vila de Cruces, un emotivo acto

para conmemorar o cuarto aniversario do pasamento do autor, falecido o 27 de

novembro de 2015.

Os actos comezaron cunha ofrenda floral no cemiterio de

Gres, onde repousan os restos do autor e da súa muller, Anisia Miranda. Entre

os asistentes estaban un grupo de alumnas e alumnos do CEIP do Foxo (A

Estrada), o secretario xeral de Política Lingüística, Valentín García Gómez; Fernando

Redondo Neira, da Fundación Xosé Neira Vilas e Antonio Couto da editorial

Bolanda, que presentou unha nova biografía do autor destinada, precisamente, a

que as  novas xeracións, coñezan a figura

do autor.

O libro Xosé Neira Vilas. Vida e obra inclúe unha

revisión áxil pero completa pola figura de Neira pero tamén un amplo álbum

fotográfico que permite non só achegarse á figura do autor senón a varios

escenarios históricos das últimas décadas, que suporán todo un descubrimento

para os máis novos. “A de Neira é unha obra que percorre a segunda metade do

século XX e as dúas primeiras décadas do XXI, mais aquilo que escribiu segue a

falar de nós e da realidade que habitamos”, explica Fernando Redondo Neira no

prólogo do libro.  

Audiocontos

para coñecer a tradición oral dos cinco continentes

A

publicación inclúe ademais un código que permite descargar outra obra senlleira

do autor, Contos vellos para rapaces novos, en formato audiolibro. O primeiro

conto puido escoitarse esta mañá na Fundación, onde tamén tivo lugar unha

pequena representación teatral a cargo das nenas e nenos do colexio estradense.

O editor Antonio Couto explicou que o formato de audio para a obra que reeditou

Bolanda tan só uns meses despois do pasamento do autor “é a mellor homenaxe que

se lle pode facer a Pepe Neira no aniversario do seu pasamento pero tamén a

mellor forma de achegar ás novas xeracións a súa obra sen desvirtuar a

orixinal, posto que os contos recompilados por Neira Vilas neste libro son,

xustamente, historias que foron pasando de xeración en xeración –en moitos

casos durante séculos– a través da tradición oral”.