A nena e o grilo máis aló, teatro sobre os medos e o valor da amizade para escolares

Afundación, a Obra Social de ABANCA, continúa coa programación de

representacións teatrais para escolares con A nena e o grilo máis aló,

unha proposta de Magín Blanco que fusiona música e teatro en galego. A

representación será mañá xoves 9 de xaneiro no Auditorio do Teatro Afundación

de Vigo con dúas sesións, ás 10.00 e ás 12.00 h.

Case 900 alumnas e alumnos de 19 centros escolares de Vigo e arredores

acudirán a ver esta obra na que a cooperación, a amizade, a tolerancia e a

superación dos medos desempeñan un papel fundamental. Os protagonistas esmagan

sen querer á súa amiga Xertrude A Araña. Buscando unha maneira de devolverlle a

vida, atópanse cuns artistas ambulantes que os guiarán a través da maxia e da

música ao País dos Mortos. Alí tentarán atopar a Xertrude para traela de volta.

EDUCACIÓN EN VALORES

Esta actividade enmárcase dentro do proxecto global de educación en

valores de Afundación. Partindo da importancia da escola como centro de

aprendizaxe, as propostas da Obra Social de ABANCA pretenden complementar o

ensino académico, especialmente a instrución, presentando uns espazos e unhas

actividades que conxuguen o lúdico e o formativo co fortalecemento de valores

esenciais para unha sociedade cohesionada. Deste xeito, a entidade está

comprometida coa tolerancia, co respecto, coa solidariedade e, por suposto, coa

adquisición por parte de cada estudante das ferramentas necesarias para

perseverar na consecución da súa autonomía persoal.

A propostas da Área Educativa de Afundación, nas que participan anualmente

máis de 136.000 escolares, abarcan múltiples disciplinas e fomentan o

desenvolvemento de competencias transversais. Así, o seu programa inclúe

actividades culturais en artes escénicas e plásticas e de fomento da lectura;

actividades interxeracionais que reforzan o respecto e o intercambio de

coñecementos entre mocidade e xente maior; actividades de educación ambiental

para abordar a importancia do respecto polo medio; actividades de novas

tecnoloxías, necesarias para o emprego das ferramentas imprescindibles nunha

contorna que innova de maneira permanente; e actividades de cociña que ensinan

os beneficios dunha alimentación saudable.