A fotógrafa Cristina García Rodero ingresa mañá sábado na Real Academia Galega de Belas Artes

A Real Academia Galega de Belas Artes (RAGBA) celebra mañá sábado, 14 de decembro,

o acto de ingreso da fotógrafa Cristina García Rodero como Académica de Honra

da institución. Será a partir das 12:30 horas no Centro Galego de Arte

Contepmporánea (CGAC), en Santiago de Compostela.

Trala intervención do presidente da RAGBA, Manuel Quintana Martelo, e da nova académica, pronunciará o

discurso de contestación Xurxo Lobato,

membro

numerario da Sección de Artes da Imaxe da institución.

A Real Academia Galega

de Belas Artes elixiu a Cristina García Rodero en sesión ordinaria celebrada o pasado

29 de xuño de 2019 “polos seus méritos relevantes, cunha importante obra

vencellada a Galicia”.

Cristina García Rodero,

fotógrafa documental nas festas de Galicia

Cristina García Rodero (Puertollano-Ciudad Real, 1949) é licenciada en

Belas Artes pola Universidad Complutense de Madrid, onde foi profesora de

fotografía. Desde os comezos da súa traxectoria como fotógrafa documental

percorreu as festas de España durante máis de vinte anos, sendo Galicia un dos

lugares onde máis traballou e ao que lle dedicou especial atención,

converténdose así a comunidade galega nun referente na súa obra creativa.

No ano 2010 o CGAC organizou unha exposición onde se recompilaba toda a súa

obra vencellada a Galicia, en colaboración co Círculo de Bellas Artes de

Madrid, editándose o libro/catálogo Transtempo,

con textos de Manuel Rivas, unha obra de referencia para comprender a súa

traxectoria fotográfica.

É membro de número da Real Academia de Bellas Artes de San Fernando e a

primeira persoa de nacionalidade española integrante de Magnun Photos. Foi

Premio Planeta de fotografía (1985), primeiro premio World Press Photo na

categoría de Arte (1993), Premio Nacional de Fotografía do Ministerio de

Cultura (1996) e Medalla de Oro al Mérito en las Bellas Artes (2005), entre

outros moitos recoñecementos nacionais e internacionais en Francia, Alemaña,

Estados Unidos, Cuba....

A súa obra expúxose en España no Museo Nacional Centro de Arte Reina Sofía,

en Madrid; Instituto Valenciano de Arte Modero (IVAM); Museo das

Peregrinacións, en Santiago de Compostela; MUSAC, en León; na Fundación Banesto

e no Centro de Arte de Alcobendas, en Madrid; ademais de en moitos museos de

Estados Unidos e doutros países de Europa e América. No ano 2018 inaugurouse un

museo en Puertollano, a súa vila natal, dedicado á súa obra fotográfica.