‘De Valdeorras a México, Terra a Nosa’

Achegar a todos os públicos dun xeito ameno e divertido á figura do poeta Florencio Delgado, homenaxeado no Día das Letras Galegas. Ese é o obxectivo de ‘De Valdeorras a México, Terra a Nosa’, un espectáculo familiar da compañía Polo correo do vento que chega este xoves 2 de xuño a Ponteareas. Será ás 18.30 horas na sala multiúsos do auditorio municipal con entrada de balde e libre ata completar aforo.

A actividade, que está financiada e organizada polos servizos de Lingua e Memoria da Deputación de Pontevedra en colaboración co Concello de Ponteareas, permitirá a nenos e nenas a partir de 5 anos e ás súas familias coñecer a vida e a obra de Delgado Gurriarán.

O público poderá gozar dunha actividade na que “se alternará a narración da biografía do poeta coa creación dunha ilustración e a interpretación de diferentes pezas musicais”, como sinala o Concelleiro de Lingua e Cultura, Fernando Groba. Contará ademais con tradución en lingua de signos, para que sexa accesible a todas as crianzas, e rematará cun pequeno coloquio adaptado ás súas idades e un obradoiro no que cada participante realizará a súa propia caricatura do autor.