As andainas mosenses prevén superar os 500 camiñantes da pasada edición

Tras o medio milleiro de participantes que fixeron as andainas medioambientais do Concello de Mos o ano pasado, a concellería de Medio Ambiente Sostible que dirixe o edil Leo Costas organiza un novo programa de andainas co que se prevé superar os 500 camiñantes da pasada edición.

O ano pasado organizáronse un total de 5 andainas, cifra que se duplica nesta ocasión, na que se realizarán un total de 10, unha por parroquia; de xeito que se farán camiñatas por Cela, Dornelas, Guizán, Louredo, Mos, Pereiras, Petelos, Tameiga, Torroso e Sanguiñeda.

O concelleiro Costas informou de que desde a administración local estase deseñando o percorrido das andainas en colaboración con diferentes colectivos parroquiais e xa se atopan definidas as características comúns que compartirán as 10 andainas.

Todas terán un percorrido cunha lonxitude mínima de 6 quilómetros e máxima de 9 quilómetros. Ningunha delas poderá ter máis dun 20% do traxecto que transcorra por asfalto. Fomentarase o paso por zonas máis descoñecidas para a veciñanza como poden ser sendeiros de regadío, carreiros, pistas, etc. Toda aportación e idea dos diferentes colectivos colaboradores será benvida.

A novidade deste ano é que ao inscribirse (a inscrición atópase xa aberta), os participantes recibirán unha camiseta conmemorativa das andainas 2022 coa listaxe das 10 camiñatas coas 10 parroquias polas que transcorren. Xunto coa inscrición, que as persoas interesadas deben formalizar a través da Sede Electrónica do Concello ou presencialmente no Rexistro Xeral Municipal, teñen que indicar a súa talla para a camiseta. A participación neste programa é totalmente libre e de balde, e poden acudir membros de toda a familia, tamén cans se son sociables.

Todas as persoas inscritas entrarán ademais a formar parte dun sorteo dun premio a consumir na hostalería local, nun negocio hostaleiro mosense.

As andainas celebraranse durante os meses de maio a outubro, os domingos en horario de 10 a 13 horas da mañá.

Os asistentes contarán con auga para beber durante o traxecto e vixianza e acompañamento por parte da Agrupación de Voluntarios de Protección Civil de Mos.

Este programa de andainas trátase dunha iniciativa que persegue o obxectivo de promover un lecer de goce do patrimonio natural local mosense, así como de concienciación medioambiental. Ocio pro medio ambiente.