A mocidade pontereán ensaia o seu dereito a participar nun pleno municipal

O

salón de plenos do concello de Ponteareas foi testemuña do pleno da infancia e

adolescencia no que participaron nove centros educativos locais: o CEIP

Feliciano Barrera, o CEIP de Santiago de Oliveira, o CPR Santiago Apóstol, o

CPR A Inmaculada, o CEIP Mestre Ramiro Sabell, o CEIP Fermín Bouza Brey, o IES

Val do Tea, o IES Barral e o IES Pedra da Auga.

Presidido pola concelleira de Ensino e tenenta de alcalde, Cristina

Fernández, acompañada do concelleiro de Mocidade, Miguel Bouzó, e da

concelleira de Benestar Social, Verónica Carrera, o pleno deu voz e voto as

representantes das escolas e institutos para expor e aprobar asuntos

relacionados coas súas principais preocupacións e necesidades.

Cada centro escolar achegou a súa valoración con motivo do 30

aniversario da convención sobre os Dereitos dos Nenos e das Nenas coincidindo

todos e todas na importancia deste fito pero tamén incidindo na necesidade de

que se aplique e se faga real.

No segundo punto, o alumnado expuxo os temas que máis lle preocupan

relacionados directamente coa xestión diaria do concello de Ponteareas e que

lles afectan directamente: locais específicos para a mocidade, o medio

ambiente, as bolsas para comedor, zonas de lecer cubertas, desprazamentos en

bicicleta e cuestións sociais como a accesibilidade ou as familias que precisan

axuda foron algúns dos temas centrais nos que a mocidade e a infancia quere

traballar co goberno local.

Nesta sesión plenaria tamén houbo ocasión de reflexionar sobre a

importancia da recente aprobación do consello municipal de infancia e

adolescencia como órgano estable de carácter consultivo e informativo.

Cristina Fernández explica que a celebración deste pleno é un dos

primeiros pasos e prácticas que amosan o compromiso do goberno de darlles voz e

amplificar as súas peticións, “que mellor xeito de que comecen a implicarse e a

deseñar o seu futuro que ocupando o salón de plenos, lugar donde se toman de

xeito oficial as principais decisións dun concello”.