Este sábado celebrouse a segunda xornada do Festival Sinsal SON Estrella Galicia na illa de San Simón, en Redondela. No programa deste sábado, 24 de xullo, a edición Esencial do festival contou coas actuacións ao vivo de mariagrep, Tarta Relena, Siricaia, Akazie e Whales. Tanxugueiras, previstas no cartel deste sábado, tiveron que cancelar a súa actuación por un positivo de covid-19 no seu equipo. No seu lugar, a troupe portuguesa Whales, cun directo incandescente e frenético, sumouse a este Sinsal Esencial, que esta noite, ás 00.00 horas, emite un concerto dunha das artistas desde o escenario virtual, accesible desde o Twitch e Instagram de Liveforevr.
Pola mañá, no marco das actividades paralelas do festival, tivo lugar un paseo en catamarán pola enseada de San Simón para 60 persoas acompañado dun concerto semiacústico de Marco Maril. O artista (Apenino, Dar ful ful) foi o encargado de presentar, por vez primeira ante o público, o seu novo traballo, 15.11.18. Os asistentes tiveron, ademais, a oportunidade de coñecer de primeira man, nunha ruta marítima dunha hora e media de duración, a memoria da illa e a historia do seu patrimonio.
Na sesión de tarde, na illa sucedéronse os concertos de mariagrep, diva galega do bedroom pop electrónico, cun repertorio que se moveu entre a electrónica, o r&b, o neo-soul e un indie pop absolutamente confesional e xeracional; o mix de folclore e experimentación de Tarta Relena, que explorou as infinitas posibilidades da voz a ritmo de folk tronado e canto gregoriano progresivo; o dúo Siricaia e a súa viaxe de volta ás raíces, a bordo de sonoridades contemporáneas e electrónicas, que van dos ritmos tradicionais portugueses ao swing, a través de percusións e guitarras eléctricas; e Whales, que demostraron que o seu celebrado son é o nexo perfecto entre o rock e a electrónica. A xornada musical completouse cunha sesión ao vivo da DJ galega Akazie.
San Simón tamén acolleu a segunda sesión das xornadas Localizar e deslocalizar. Conversas internacionais sobre igualdade, patrimonio e cambio climatico, nesta ocasión nomeada Cultura e cooperación para o desenvolvemento rural coa participación de Risogimarche (Italia) e Anceu Colivig (Galicia), nunha mesa moderada por Fran Quiroga.
DOMINGO
O público partirá da Estación Marítima de Vigo (14.00h) e do embarcadoiro de Meirande (15.15h) para percorrer a Ría de Vigo e chegar a unha illa na que se celebrarán catro concertos (en dous escenarios: San Simón SON Estrella Galicia e Fest Galicia Xacobeo 21-22, ás 15.00h, 16.00h, 17.15h e 18.45h), unha conversa sobre o futuro sostible da industria cultural (que terá lugar ás 16.00h) e unha sesión de DJ para animar a despedida. Durante a tarde, as e os asistentes poderán visitar e coñecer de perto a memoria e a natureza que se atopa no arquipélago conformado por San Simón e San Antón.
Cada día, ás 17.00 horas, na web oficial do festival (https://festival.sins.al), Sinsal publica a información relativa ao cartel da correspondente xornada, descubrindo así as artistas e bandas participantes do cartel xusto no momento no que o público do día chega á illa.
O FESTIVAL
Sinsal SON Estrella Galicia celébrase desde o ano 2010 na illa de San Simón coa intención de achegar unha programación coidada de artistas emerxentes e contemporáneos da escena nacional e internacional á vez que se pon en valor o patrimonio natural e histórico da illa (un pequeno arquipélago conformado por San Simón e San Antón, declarado Ben de Interese Cultural). Neste tempo, Sinsal acadou recoñecementos nos Premios FEST e nos Iberian Festival Awards tanto pola súa programación como polo desenvolvemento da súa Estratexia de Sustentabilidade. Logo da pandemia por mor da covid-19 e unha edición no litoral, Sinsal regresa á Illa de San Simón e recupera a esencia da proposta: música ao vivo, contacto coa natureza e un cartel secreto encabezado pola propia illa atlántica.
Sinsal SON Estrella Galicia é un festival impulsado por Sinsalaudio, que conta co patrocinio de Estrella Galicia, da Deputación de Pontevedra, de Turismo Rías Baixas e da Xunta de Galicia a través do programa FEST Galicia no marco do Xacobeo 21-22.
