Ponteareas despídese das festas de setembro este martes, día San Miguel, co concerto de Guadi Galego na Feira Vella, a partir das 21.00 horas. Esta actuación que foi adiada por mor da climatoloxía adversa do sábado, pechando cunha das más premiadas e afamadas artistas galegas as festas de setembro.
Durante este martes festivo local, ás 18.30 horas, arrancará dende o parque da Feira Vella o espectáculo itinerante 'Laia aprendiz de maga' rumbo á praza de Ponteareas Cidade para o goce de nenos, nenas e maiores. Ás 20.30 horas actuará a banda de música Xuvenil de Xinzo tamén no parque da Feira Vella e ámbalas dúas actividades con entrada de balde.
GUADI GALEGO
Guadi Galego é un dos artistas máis relevantes da escena galega, froito dunha carreira musical que comezou dende moi nova. En 1997 uniuse a Berrogüetto, como vocalista, pianista e gaiteiro, e gravou con eles tres discos: Viaxe por Urticaria (1999) e Hepta (2001), foron recibidos calorosamente pola crítica e foron obxecto de varios premios e recoñecementos (incluído o de Mellor grupo de folk europeo do 2000 e unha nominación aos Grammy latinos na súa edición de 2002). Seguíronlles 10.0 (2006), que gañou o segundo premio de opinión ao mellor álbum galego do ano e foi candidato aos Premios da Música coa súa canción "Xente".
Daquela, Guadi xa comezaba a experimentar con diferentes sons en grupos como o seu proxecto máis íntimo e persoal, Espido (con Guillerme Fernández) ou Nordestin @ s (con Abe Rábade e Ugia Pedreira), ambos galardoados tamén co premio ao mellor álbum galego. Finalmente, no 2009 saíu Benzón, un disco aclamado pola crítica galega e española co que comezou a súa carreira en solitario, mentres seguía participando noutros proxectos. Así, no 2012 saíu aCadaCanto, un proxecto íntimo no que volve traballar con Guillerme Fernández, acompañada tamén por Xabier Díaz á voz e Xosé Lois Romero ao acordeón.
En 2014 saíu o seu segundo disco en solitario, Lúas de outubro e agosto e en 2016, ano no que gañou o premio Martín Códax da Música ao mellor artista na categoría de compositor, saíu o terceiro, O mundo Está parado. Este disco viaxa desde a reflexión persoal á colectiva sobre temas como a identidade e a coherencia, desenvolvendo un son envolvente cunha esencia pop que reapareceu no EP Bóla de cristal (2018). Para o 2019 prepara a publicación de Inmersión, unha relectura musical e lingüística dos seus traballos recentes da que avanzou unha versión de "Cedeira" na que colabora Iván Ferreiro.
