O director de Políticas Culturais da Xunta participou na apertura da mostra ‘Camiño ComPostal’ no marco de ‘O teu Xacobeo’ que se poderá visitar no Museo das Peregrinacións e de Santiago ata finais do mes de abril.

Camiño ComPostal, as primeiras fotografías coñecidas de peregrinos

O director de Políticas Culturais, Anxo M. Lorenzo, participou hoxe na apertura de Camiño ComPostal, unha mostra comisariada por José M. Salgado, coordinada pola Asociación de Periodistas e Estudosos do Camiño e apoiada pola Xunta de Galicia a través de O teu Xacobeo, o programa posto en marcha polo Goberno galego co obxectivo de fomentar a participación de toda a cidadanía na celebración do vindeiro Ano Santo.

Camiño ComPostal está formada por cerca de 130 postais de principios do século XX que amosan as primeiras fotografías coñecidas de peregrinos. Trátase dunha mostra itinerante que arrancou no Cebreiro o pasado mes de outubro e que foi facendo paradas ao longo do Camiño Francés ata chegar a Compostela, onde se poderá visitar ata finais do mes de abril. Durante o acto de apertura, o director de Políticas Culturais destacou o valor das pezas expostas e subliñou que permiten descubrir monumentos, paisaxes e peregrinos de hai máis dun século.

A través de dez paneis, a exposición propón viaxar no tempo partindo das catro vías históricas do Camiño Francés (Vía de Tours, Podiense, lemovicensis e Tolosana) para entrar en España por Roncesvalles e Somport. As imaxes de peregrinos -ataviados con bordón, esclavina e cuncha de vieira- mistúranse con fermosas postais de monumentos das principais cidades polas que pasa este itinerario, paisaxes e incluso das xentes, oficios e ocupacións da España da época.

Print Friendly, PDF & Email
Me gusta
Me gusta Me encanta Me divierte Me asombra Me entristece Me enfada