viernes. 29.03.2024

As directoras xerais de Xuventude, Participación e Voluntariado, Cristina Pichel, e a de Patrimonio Natural, Belén do Campo, visitaron este sábado á vintena de persoas que están participando no programa de voluntariado Proxecto Lewo que realiza tarefas de conservación no Monte Aloia.

As directoras xerais compartiron coas mozas e mozos parte

da súa fin de semana de actividades na que realizaron diferentes accións

voluntarias como a eliminación de malas herbas ou unha ruta pola contorna. 

Cristina Pichel destacou que se trata dun programa que fomenta

o respecto pola natureza e os espazos naturais ao mesmo tempo que implica á

xuventude de forma activa sobre o seu coidado e protección. Neste sentido,

sinalou que as 370 prazas que se ofertan nesta edición permitirán que as mozas

e mozos poidan coñecer de preto os lugares de máis interese medioambiental da

comunidade.

Así mesmo, a directora xeral de

Patrimonio Natural, Belén do Campo, incidiu na importancia que ten o

proxecto Lewo de cara a acadar un dobre obxectivo: sensibilizar e concienciar á

sociedade sobre o valor do patrimonio natural galego a través das accións que

se realizan nestes espazos, e promover entre a xuventude o chamado voluntariado

medioambiental, co fin de lograr a súa implicación activa na tarefa de

“conservar e protexer a riqueza única” de Galicia.

Neste sentido, enmarcou a liña de colaboración

existente desde fai anos entre as consellerías de Política Social e de Medio

Ambiente, Territorio e Vivenda, un bo entendemento que resulta fundamental,

engadiu, para “coidar e conservar un dos nosos maiores tesouros”.

PRAZO ABERTO

Desta maneira, lembraron que continúa aberto o prazo de inscrición para os interesados en participar este ano neste proxecto da iniciativa europea Lewo, que celebra actividades de voluntariado todos os fins de semana ata xuño. 

As actividades realizaranse no Parque

Nacional das Illas Atlánticas; en cinco dos seis parques naturais de Galicia (Baixa

Limia- Serra do Xurés, Monte Aloia, Serra da Enciña da Lastra, O Invernadeiro e

Complexo dunar de Corrubedo e lagoas de Carregal e Vixán); así como en dúas das

seis reservas da biosfera da comunidade (As Mariñas Coruñesas e Terras de

Mandeo, e Terras do Miño), e na Ribeira Sacra.

O Monte Aloia xa ten voluntarios para a súa conservación