Pilar Arjones Martínez, a avoa de San Rafael de Pereiras, cumpriu 100 anos este sábado, día 21 de decembro, e os seus veciños e veciñas da urbanización de San Rafael, na parroquia de Pereiras, quixeron homenaxeala polo seu aniversario cunha festa no local social da Asociación de Veciños, á que acudiron tamén o concelleiro da parroquia, Leo Costas, e a alcaldesa de Mos, Nidia Arévalo.
Tratouse dunha emotiva celebración na que Pilar estivo rodeada de familiares, amigos e
veciños, ademais das súas dúas fillas, Purificación Rodríguez Arjones e María
Isabel Rodríguez Arjones, dos seus catro netos e das súas dúas biznetas.
A AVV San Rafael de Pereiras encargouse da organización deste emotivo encontro de celebración, homenaxe a Pilar Arjones polo seu centenario. No evento festivo participaron artistas do barrio como Tamara Casal xunto ao seu "Coro Sentimento", o grupo de ‘Comercial Dance’ da Asociación "DanzaMos" e a cantante Antía Caride, xunto ao guitarrista Juan Caride. Despois das actuacións proxectouse un vídeo, realizado polas súas netas, sobre a vida da homenaxeada con felicitacións de xente do barrio.
As súas fillas definen
a Pilar Arjones como “unha persoa moi bondadosa, sempre disposta a axudar aos
demais; a nosa casa era a casa de todos”, din. Destacan da súa nai que “no
barrio todo o mundo a coñece e a quere, sempre foi unha muller moi activa e moi
tenaz”. Tanto é así que, en 1979, con 60 anos de idade, sufriu un ictus que a
tivo 3 meses hospitalizada e 2 anos de rehabilitación; e tras o que tivo que
aprender a camiñar e a falar de novo. Pero logrouno, recuperou ao 100% grazas á
súa tenacidade, e agora ven de cumprir 100 anos co mellor dos seus sorrisos.
Pilar Arjones Martínez
é natural de Pías, Ponteareas. De moi nova trasladouse a Vigo para traballar na
Etea e máis tarde a Ferrol. Logo regesou e traballou na parroquia mosense de
Sanguiñeda, onde coñeceu ao seu actual marido (natural da devandita parroquia),
Manuel Rodríguez Fontán, de 92 anos. Tras casarse viviron unha tempada en
Sanguiñeda e durante eses anos Pilar e Manuel tiveron que lamentar o duro
trance de perder ao seu primeiro fillo durante o parto. Logo chegaría a
segunda, Purificación, tras cuxo nacemento se trasladaron a vivir ao barrio de
San Rafael en Pereiras, onde naceu a súa filla María Isabel e onde seguirían
vivindo ata a acrualidade e continúan a día de hoxe. Son unha familia moi
querida no barrio, familia que en breve se ampliará porque ven de camiño o
terceiro bizneto de Pilar.
